Id-dramm Kisbiet Minsija intwera f’bosta djar tal-anzjani madwar Malta fi żmien xahar. Wara dan il-perjodu intensiv, id-dramm ħa jintwera lil pubbliku f’żewġ serati fit-teatru ta’ Spazju Kreattiv. 

Ċensina hija mara t’ għoxrin sena, li tgħix f’Ħaż-Żabbar fis-sebgħinijiet. Bħalissa, fid-dar fejn qed tgħix, hemm ukoll in-nanniet tagħha, ommha, oħtha Marija, żewġha Frankie, u binha ż-żgħir Luka. Dar kemmxejn żgħira u storbjuża, iżda mimlija stejjer! L-istejjer tagħha mhumiex xi ħaga neċessarjament straordrinarja imma huma speċjali għaliex huma stejjer ta’ ħajjitha. Dawn l-istejjer jgħinuha tirrealizza x’tip ta’ mara trid issir.

Kisbiet Minsija huwa proġett ikkreat f’kollaborazzjoni mal-kommunità anzjana li jiffoka fuq l-esperjenzi tan-nisa anzjani li għandhom ‘l fuq minn 70 sena. Diversi nisa minn sfondi differenti ġew intervistati fuq it-trobbija tagħhom, il-ħajja tal-familjari tagħhom, u mumenti speċifiċi li għinuhom jikbru u jsiru n-nisa li huma llum. Din il-wirja teatrali tesplora l-esperjenzi tan-nisa fis-soċjetà Maltija lil hinn mil-perspettiva tradizzjonali tal-mara tad-dar.

Kisbiet Minsija ħa ssir f’Studio A ġewwa Spazju Kreattiv
Il-Ġimgħa 22 ta’ Lulju 8-9pm (interpretata minn Robyn Vella)
Is-Sibt 23 ta’  Lulju 8-9pm (interpretata minn Daniela Grech)