Arti – Astratt – Espressjoniżmu

Ftuħ: Is-Sibt 3 ta’ Settembru 2016
Għeluq: L-Erbgħa 12 t’Ottubru 2016
Post: Spazju A (Kavallier ta’ San Ġakbu)

Fil-wirja, Persistence of Form (il-Persistenza tal-Forma), l-artist He Ping, jinseġ xi wħud mill-elementi ikoniċi tal-kultura Ċiniża u jagħtihom dehra kontemporanja skont l-istil espressjonist tiegħu. Għalkemm l-arti ta’ Ping tista’ tinġabar taħt id-definizzjoni ġenerali tal-astratt, ix-xogħlijiet tiegħu huma xorta waħda marbuta man-natura, mal-ħajja u mal-bniedem, fis-sens li l-kwalitajiet intrinsiċi tagħhom huma mogħtija dimensjoni spiritwali, iżda tanġibbli, riflessa fil-forma esterjuri tagħhom. Ix-xogħlijiet ta’ Ping huma animati permezz tas-saħħa tal-kuntrast monokromatiku tal-linka sewda fuq tila bida.

Fuq livell estetiku, il-forom ta’ Ping ilissnu illużjoni ta’ figura mitlufa f’meditazzjoni profonda, iżda r-rappreżentazzjonijiet tiegħu, jew aħjar, is-simboliżmu ta’ dawn il-forom jikxfu dak li hu mistur għall-għajn: simboli li huma definiti permezz tax-xbihat familjari tal-kalligrafija Ċiniża.